O Castro da Igualdade

Comezamos o ano 2025 co agasallo dos seguintes materiais e xogos feministas para a nosa biblioteca, co gallo dos premios acadados polo noso alumnado (Silvia Calvo, Sara López e Daniel Peña) no certame de cartaces do 25N lanzado desde a Concellería da Área de Benestar Social, Igualdade, Educación e Contratación do Concello das Pontes.  Grazas a isto, o noso alumnado pode continuar desenvolvendo aprendizaxes baseadas no feminismo, o respecto e a igualdade tamén no seu tempo de lecer. Animádesvos a romper roles dexénero e atopar antídotos contra o machismo mentres desfrutades? 😅

Continuando coa semana do 25N, o alumnado de 3º e 4º da ESO desfrutou da participación do noso IES no programa Que non te líen. Ti elixes. Esta iniciativa pretende ofrecer unha orientación laboral que fuxa dos prexuízos de xénero e permita escoller libremente sen valoracións baseadas en concepcións sociais erróneas que afectan, en especial, ás mulleres, á hora de escoller a súa formación profesional.  Nestas sesións que compartiron co noso alumnado centráronse na presenza de mulleres no sector metalúrxico, tradicionalmente masculino, achegando á rapazada a realidade actual: cada vez máis mulleres se incorporan a este sector, se ben seguen sendo minoría. É por iso que traballaron arredor dos estereotipos de xénero, as condicións laborais e a representación feminina e o coñecemento de nomes nestes sectores.  Foi unha xornada de reflexión e esperanza de cambio futuro! ✨

 Durante o mes de novembro, o alumnado de 4º ESO achegouse ás Irmandades da Fala e o Grupo Nós, dúas entidades que traballaron a prol da dignificación e revitalización da cultura, lingua e literatura galegas. Así e todo, as figuras máis destacadas son as dos homes, con nomes como Cabanillas, Castelao, Risco, Pedrayo... Con todo, tamén houbo mulleres con implicación nestes labores políticos, sociais e culturais na Galiza do primeiro terzo do S.XX.  É por iso que a rapazada elaborou uns currículos sobre algunhas destas figuras esquecidas a fin de visibilizar o seu traballo e recoller os seus nomes nas páxinas da historia, axudando a crear unha memoria colectiva na que a muller non queda no esquecemento.  Botádelle un ollo a algunhas destas producións!👀👏

O luns 25 de novembro, o alumnado do IES participou nun acto conmemorativo das vítimas da violencia machista. Para iso, o alumnado de 1º ESO realizou unha lectura de dous poemas de Marta Dacosta sobre esta temática no ámbito doméstico, a fin de concienciar e facer reflexionar ao resto da comunidade educativa arredor desta problemática aínda actual.  Ademais, Álvaro e Noa, de 2º ESO, presentaron o acto facendo fincapé na orixe da celebración e na historia das irmás Mirabal, cruelmente asasinadas por seren mulleres símbolo de resistencia política e social na ditadura de Rafael Trujillo.  Deixámosvos aquí unhas imaxes do acto e os poemas recitados!💜💪 Desde o abrente cosendo bágoas no rodo da saia rota, cosendo a dor de cada golpe contra o peito, contra o peito seco. Remendando. Remendando as feridas das tesoiras azuis nos cabelos mozos, as feridas que no corpo falan de todo o que destecendo calas, de todo o que calando esqueces, de todo o que amargamente ocultas no fondo da mem...

Nesta primeira avaliación, o alumnado de 2º ESO achegouse aos textos argumentativos e puxo en práctica as súas aprendizaxes co microproxecto Alegatos das mulleres galegas. O seu obxectivo era procurar unha figura feminina que destacara nun eido determinado e explicar por que debiamos de coñecer o seu labor e reivindicalo co paso do tempo.  Moitas destas mulleres eran descoñecidas para eles, polo que tamén lles serviu para rescatar nomes esquecidos da nosa historia. Algunhas delas, como María Pita ou María Luz Morales, foron as claras favoritas da rapazada, aínda que tamén houbo espazo para deportistas que continúan hoxe colleitando éxitos! Aquí vos deixamos algunhas das creacións👀👏       

O martes 22 de outubro, o alumnado de 2º ESO achegouse á cidade de Lugo para visitar a exposición  ELAS,  ubicada no Vello Cárcere. Trátase dunha exposición permanente coordinada pola investigadora da USC Aurora Marco na que diferentes artistas luguesas homenaxean a mulleres galegas que destacaron no mundo das artes en diferentes eidos. O alumnado tivo a oportunidade de coñecer esta obra que pon en valor a figura da muller artista a través da pintura, creando un espazo para honralas no corazón da cidade 

 Benvid@s ao Castro da Igualdade! A creación deste espazo de publicacións vencéllase ao Plan Proxecta Donas de si, unha liña incorporada no noso centro, o IES Plurilingüe Castro da Uz, desde o curso 2024/25. O noso obxectivo é traballar en materia de igualdade, empoderamento feminino e visibilización dun colectivo social que aínda hoxe está a atopar dificultades para desenvolverse en condicións parellas ao masculino.  É por iso que abordaremos un enfoque interdisciplinar e transversal para achegarnos a aprendizaxes desta índole a través de diferentes actividades, coas que o alumnado poderá reflexionar e desbotar prexuízos, a fin de medrar e construír unha sociedade máis tolerante e respectuosa. O futuro é seu!  Neste blog poderedes atopar resumos do traballo que iremos realizando nesta liña ao longo do curso. Acompañádenos e desfrutade da viaxe polo noso Castro, o da Igualdade!   Logotipo do noso proxecto