O Castro da Igualdade

Para celebrar o fin do primeiro trimestre e a chegada do Nadal, propuxemos ao alumnado unha actividade, en colaboración co Equipo de Biblioteca: un calendario de advento 🗓 con citas de mulleres relevantes na historia, especialmente do panorama galego. Así pois, nomes como o da científica Marisol Soengas, a médico María Rosaura Lois Trabazo, a escritora e xornalista Concepción Arenal, as poetas Xela Arias e Rosalía de Castro ou a artesá Elena Ferro sucedéronse entre as mans do noso alumnado, que lía e coñecía as súas citas arredor das disciplinas que colleitaron ao tempo que recollían pequenos agasallos de Nadal.  Deixámosvos aquí algunhas imaxes desta experiencia que seguramente repetiremos en vindeiros cursos!                                                                           ...

Nas dúas últimas semanas de novembro, o Departamento de EPVA, xunto co Equipo de Biblioteca, convocou no noso IES un concurso de cartelería fronte á violencia de xénero, con motivo da conmemoración do 25N. O alumnado elaborou cadanseus carteis para seren expostos posteriormente na biblioteca do centro, que acolleu tamén alí o Punto Violeta do Concello das Pontes, onde o alumnado se puido informar sobre diferentes cuestións en relación con esta temática e onde tamén realizou obradoiros da man de dúas psicólogas expertas na materia. As premiadas no certame de carteis recibiron sendos diplomas acreditativos e vales para a cafetería do IES. Ademais, grazas ás ferramentas do noso #PoloCreativo, tamén puideron desfrutar dun novidoso premio: un chaveiro co símbolo feminista e o logo do noso IES. Aquí vos deixamos imaxes dos carteis e das gañadoras, parabéns, rapazas!                                   ...

 A semana do 25 de novembro, o equipo de biblioteca organizou un pequeno taller para redactar un manifesto feminista que se lería no acto reivindicativo convocado polo centro o 25 de novembro, antes do recreo.  Neste obradoiro participaron 3 rapazas de 2º ESO que tiñan moi claras as súas denuncias: fronte á violencia contra a muller, por unha infancia digna sen necesidade de mudar a vida por completo coa chegada da adolescencia, coa axuda dos seus compañeiros rapaces e a favor dun reconto real das vítimas, falecidas e non. Tamén abriron espazo de reflexión sobre o uso e impacto que as redes teñen entre a rapazada en relación con temáticas como o desprestixio e minorización das figuras femininas, nun tempo no que semellaba que iso debería de estar xa superado, pois os e as adolescentes de hoxe en día teñen un maior acceso á información que noutras épocas, pero son espectadores de escándalos en materia de violencia de xénero nos círculos das personalidades que teñen como referen...

Os clubs de lectura dos Argallantes das Letras participaron nun microproxecto fronte á violencia de xénero, en colaboración coa biblioteca do centro, durante as semanas previas ao 25N. Así pois, nestas reunións de novembro leron poemas de autores como Marta Dacosta, Carlos Negro ou Olga Novo que lles fixeron reflexionar sobre que é a igualdade, que persegue, onde comeza e remata a liberdade individual e por que precisamos unha sociedade máis xusta e respectuosa, sen importar o xénero das persoas nin as súas escollas.  Logo desta reflexión, houbo tamén un proceso de búsqueda de información en fontes oficiais arredor dos casos de violencia de xénero que azoutaron as sociedades galega e españolas neste 2025. Con estes datos elaboráronse carteis con titulares que recollían as informacións principais e que pretendían impactar coa súa lectura. A biblioteca do IES serviu como espazo de exposición dos mesmos, a carón dos carteis elaborados na materia de Educación Plástica e Visual.  T...

Na véspera de Samaín, o alumnado de 4° ESO achegouse ás orixes da bruxería e da caza de bruxas desde un punto de vista biolóxico. Así, descubriu algúns dos motivos polos que se levou a cabo esta práctica discriminatoria durante longos períodos da nosa historia, moitas veces motivada por algunhas síndromes que afectaban ás vítimas e que a sociedade mesmo descoñecía.  Aproveitamos o Samaín para coñecer os erros do pasado a fin de non repetilos, botando man da ciencia! 🌌  

Comenzamos o curso 25/26 con novas actividades a prol da visibilización do traballo feminino en diferentes eidos.  Desde o Equipo de Biblioteca propuxeron, para a semana das escritoras (13-17 de outubro) un achegamento á obra das mulleres que aínda hoxen nos ceden a súa voz e palabra para facernos rir, pensar, imaxinar e reflexionar, entre outras emocións 💭. Ademais, creouse un expositor con libros da biblio para lembrar algunhas destas figuras e animar ao alumnado a adentrarse nas súas creacións.  Un percorrido polo seu traballo, a honrar! 📖                                                                    

Co gallo da celebración das Letras Galegas 2025, dedicadas ás cantareiras e á música tradicional que elas nos transmitiron e preservaron, o IESP Castro da Uz dinamizou varias actividades entre o seu alumnado. Unha delas foi o traballo de recollida e investigación na contorna para atopar figuras femininas que manteñen hoxe en día a tradición oral popular a través de asociacións de proximidade. O resultado das súas pesquisas tivo como froito a elaboración dunhas fichas nas que presentaron mulleres do seu concello e limítrofes, moitas veces nais, avoas, tías e mesmo algunha profe que dedican parte do seu lecer á música tradicional galega.  Con elas pechamos este curso de traballo a prol da igualdade e a visibilización da muller. Agardamos xa polo seguinte para continuar promovendo estes valores entre o noso alumnado! 🌊🌞